វេទិកា សំណួរ-ចម្លើយ
តេស្តសំណួរអុិស្លាម
ឯកសារកូដតើការបួសនៅក្នុងសាសនាឥស្លាមមានន័យដូចម្តេច?
🟢 ចម្លើយ ៖ ការបួសនៅក្នុងសាសនាឥស្លាម មានន័យថា ការគោរពសក្ការៈទៅចំពោះអល់ឡោះដោយការតមអាហារ ការតមទឹក និងប្រការទាំងឡាយណាដែលនាំឲ្យខូចបួស ចាប់ពីសេតារុណរះ(ហ្វាជើររះ)រហូតដល់ថ្ងៃលិច ដោយភ្ជាប់ជាមួយនឹងការនៀត(តាំងចិត្ត) ។
ឧត្ដមភាពនៃការបួស فضائل الصيام
🔹 ១- ការបួស ជារនាំងការពារពីពាក្យសម្ដីគ្មានប្រយោជន៍ និងចំណង់តណ្ហា ។
🔹 ២- ជាមូលហេតុដែលនាំឲ្យចូលឋានសួគ៌ ។
🔹 ៣- ផលបុណ្យរបស់វាធំធេងណាស់ ហើយវាស្ថិតក្នុងប្រភេទនៃការអត់ធ្មត់ទាំងបី ។
🔹 ៤- ក្លិនមាត់របស់អ្នកបួសសម្រាប់អល់ឡោះ គឺក្រអូបជាងក្លិនទឹកអប់ទៅទៀត ។
🔹 ៥- វានឹងជួយដល់ម្ចាស់របស់វានៅថ្ងៃបរលោក ។
🔹 ៦- ទ្វារឋានសួគ៌សម្រាប់អ្នកបួស ឈ្មោះថា «ទ្វាររ៉យ្យ៉ាន» ។
🔹 ៧- ជាមូលហេតុធ្វើឲ្យការបួងសួងត្រូវបានគេឆ្លើយតប ។
: من فضائل الصيام
١ - الصوم جنة أي وقاية من اللغو والشهوات.
٢ - سبب لدخول الجنة.
٣ - أجره عظيم و يدخل فيه أنواع الصبر الثلاث.
٤ - خلوف فم الصائم أطيب عند الله من ريح المسك.
ه- يشفع لصاحبه يوم القيامة.
٦ - باب خاص للصائمين (باب الريان) في الجنة.
٧ - سبب لاستجابة الدعاء
តើហេតុអ្វីបានជាអល់ឡោះបញ្ជាឲ្យអ្នកឥស្លាមបួស? តើគោលបំណងធំបំផុតនៃការបួសជាអ្វី?
💠 អ៊ីម៉ាំ អ៊ីបនូ រ៉ជប់ អាល់ហាំហ្ពាលី رحمه الله បានមានប្រសាសន៍ថា ៖
« គេបានសួរអ្នកជំនាន់មុនមួយចំនួនថា : ហេតុអ្វីបានជាគេដាក់ច្បាប់ឲ្យបួស? គាត់បានឆ្លើយថា ៖ ដើម្បីឲ្យអ្នកមានស្គាល់រសជាតិនៃភាពអត់ឃ្លាន ហើយគាត់មិនភ្លេចអ្នកដែលស្ថិតនៅក្នុងភាពអត់ឃ្លាន » ។
قال الإمام ابن رجب الحنبلي رحمه الله : « سئل بعض السلف : لم شرع الصيام ؟ قال : ليذوق الغنى طعم الجوع فلا ينسى الجائع » . لطائف المعارف (168)
👉 នេះជាមូលហេតុមួយនៃបណ្តាមូលហេតុដែលអល់ឡោះដាក់កាតព្វបួសគឺ ដើម្បីឲ្យអ្នកមានដឹងពីទុក្ខលំបាករបស់អ្នកក្រ ។
💠 ស្ហៃខ មូហាំម៉ាត់ ពិន អ៊ូមើរ ហ្ពាហ្សមូល បានបកស្រាយថា ផ្អែកលើអាយិតលេខ១៨៣ នៃស៊ូរ៉ោះអាល់ប៉ាកោរ៉ោះ ជុំវិញគោលបំណងធំបំផុតនៃការបួសខែរ៉ម៉ាឌនគឺ ដើម្បីទទួលបាន "អាត់តក់វ៉ា" ដែលមានន័យថា ការខ្លាចអល់ឡោះ ការមានអ៊ីម៉ាន់ និងន័យផ្សេងៗជាច្រើនទៀត ។
ចម្លើយ ៖ ដើម្បីឲ្យការបួសរបស់អ្នកទទួលបាន «អាត់តក់វ៉ា» ដូចមាននៅក្នុងអាយិតគួរអានខាងលើ ចូរអ្នកធ្វើ៤ប្រការដូចខាងក្រោម ៖
១- យើងត្រូវបួសដោយមានអ៊ីម៉ាន់ចំពោះអល់ឡោះ និងរ៉ស៊ូលុលឡោះ ហើយត្រូវមានជំនឿថា «ការបួសជារ៉កុនមួយក្នុងចំណោមរ៉កុនទាំង៥នៃឥស្លាមដែលវ៉ាជិប» ។
២- ត្រូវបួសដោយមានចិត្តចង់បានប៉ះឡាពីអល់ឡោះ ត្រូវមានចិត្តស្មោះសរចំពោះអល់ឡោះ មិនត្រូវមានចិត្តចង់បានការសរសើរពីមនុស្សលោក ឬគ្រាន់តែបួសដើម្បីកុំឲ្យគេចោទថា ជាមនុស្សខុសគេក្នុងសង្គម ឬបួសតាមប្រពៃណីទំនៀមទម្លាប់ ឬផ្សេងៗនោះឡើយ ។
៣- ត្រូវប្រញាប់ប្រញាល់តៅហ្ពាត់ និងបោះបង់ប្រការម៉ាក់ស៊ីយ្យះ ។
៤- ត្រូវបោះបង់ការនិយាយកុហក ការនិយាយដើមអ្នកដទៃ ត្រូវបោះបង់ការពាំនាំសម្តីមិនល្អពីមនុស្សម្នាក់ទៅម្នាក់ទៀត បោះបង់សម្តីអសុរោះ ជាពិសេសសម្តីអាសអាភាស និងការនិយាយអ្វីដែលមិនសមរម្យ ។
ដូចក្នុងហាទីសរាយការណ៍ដោយ អាល់ពូខរី (១៩០៣) ណាពីﷺបានមានប្រសាសន៍ថា ៖ « បើនរណាហើយបួសដោយមិនព្រមបោះបង់ការនិយាយកុហក ការនិយាយដើមអ្នកដទៃ ឬធ្វើប្រការម៉ាក់ស៊ីយ្យះ និងរំលោភបំពានអ្នកដទៃ នោះអល់ឡោះមិនត្រូវការឡើយនូវការបួសរបស់គាត់ដោយការតមអាហារ » ។
និងហាទីស អាពី ហ៊ូរ៉យរ៉ោះ រាយការណ៍ដោយ អាល់ពូខរី និងមូស្លិម ណាពីﷺបានមានប្រសាសន៍ថា ៖ « បើសិនជាថ្ងៃដែលអ្នកបួស ចូរកុំនិយាយពាក្យអសុរោះ កុំនិយាយពាក្យអាសអាភាស (មិនត្រូវរួមរ័កពេលថ្ងៃ) និងមិនត្រូវនិយាយពាក្យដែលមិនសមរម្យ ហើយបើសិនជាមាននរណាម្នាក់រំលោភបំពានមកលើអ្នក ចូរអ្នកកុំតបទៅគេវិញដូចដែលគេធ្វើមកលើអ្នក ពីព្រោះ ការបួស មិនអនុញ្ញាតឲ្យធ្វើទង្វើបែបនេះឡើយ » ។
🌐 ប្រភព ៖ គេហទំព័ររបស់ស្ហៃខ
✍️ ស្លេះ ម៉ាត់លី : https://www.facebook.com/100000519026228/posts/8036378816389339/
តើអ្នកបួសទទួលបានផលបុណ្យអ្វីខ្លះ?
💠 រ៉ស៊ូលុលឡោះﷺមានប្រសាសន៍ថា ៖
« អល់ឡោះបានមានបន្ទូលថាៈ រាល់ទង្វើរបស់កូនចៅអាដាំ គឺសម្រាប់គាត់ លើកលែងតែបួស វាគឺសម្រាប់យើង ហើយយើងគឺជាអ្នកតបស្នងវា។ ការបួស គឺជារនាំង ប្រសិនបើថ្ងៃណាមួយដែលពួកអ្នកណាម្នាក់បួស ចូរគាត់កុំនិយាយស្ដីអសីលធម៌ កុំស្រែកឡូឡា ប្រសិនបើមានអ្នកណាម្នាក់ជេរប្រមាថគាត់ ឬបង្កជម្លោះជាមួយគាត់ ចូរឲ្យគាត់និយាយថា ការពិតខ្ញុំគឺជាអ្នកបួស។ ស្បថនឹងអ្នកដែលខ្លួនខ្ញុំស្ថិតនៅលើដៃរបស់ទ្រង់ថា ក្លិនមាត់របស់អ្នកបួសនៅចំពោះមុខអល់ឡោះនៅថ្ងៃបរលោកក្រអូបជាងក្លិនទឹកអប់ ហើយសម្រាប់អ្នកបួសនឹងទទួលបានការរីករាយពីរដង គឺការរីករាយនៅពេលស្រាយបួស និងនៅពេលជួបម្ចាស់របស់គាត់ គាត់នឹងរីករាយនឹងបួសរបស់គាត់ » ។
រ៉ស៊ូលុលឡោះﷺ
🔹 នៅក្នុងសេចក្ដីរាយការណ៍មួយទៀតថា ៖
« គាត់បោះបង់ចោលអាហារ ទឹក និងតណ្ហាដើម្បីយើង។ ការបួសគឺសម្រាប់យើង យើងគឺជាអ្នកតបស្នងវា ហើយទង្វើល្អមួយនឹងក្លាយទៅជាដប់ » ។
រ៉ស៊ូលុលឡោះﷺ
🔹 នៅក្នុងសេចក្ដីរាយការណ៍ផេ្សងទៀតរបស់មូស្លីមថា ៖
« រាល់ទង្វើកូនចៅអាដាំ គេនឹងតំឡើងផលបុណ្យពីមួយរហូតដល់ដប់ និងរហូតដល់៧០០។ អល់ឡោះបានមានបន្ទូលថាៈ លើកលែងតែការបួស វាគឺសម្រាប់យើង យើងគឺជាអ្នកតបស្នងដោយផ្ទាល់ ដោយសារគាត់បោះបង់ចោលតណ្ហា និងអាហាររបស់គាត់ដើម្បីយើង។ សម្រាប់អ្នកបួសនឹងទទួលបានការរីករាយពីរដង គឺការរីករាយម្ដងនៅពេលស្រាយបួស និងម្ដងទៀតនៅពេលជួបម្ចាស់របស់គាត់ ហើយក្លិនមាត់របស់គាត់(នៅថ្ងៃបរេលោក)ក្រអូបជាងក្លិនទឹកអប់ » ។
عنْ أَبي هُريرة رضِي اللَّه عنْهُ ، قال : قال رسُولُ اللَّهِ ﷺ : « قال اللَّه عَزَّ وجلَّ : كُلُّ عملِ ابْنِ آدم لهُ إِلاَّ الصِّيام ، فَإِنَّهُ لي وأَنَا أَجْزِي بِهِ . والصِّيام جُنَّةٌ فَإِذا كَانَ يوْمُ صوْمِ أَحدِكُمْ فلا يرْفُثْ ولا يَصْخَبْ ، فَإِنْ سابَّهُ أَحدٌ أَوْ قاتَلَهُ ، فَلْيقُلْ : إِنِّي صَائمٌ . والَّذِي نَفْس محَمَّدٍ بِيدِهِ لَخُلُوفُ فَمِ الصَّائمِ أَطْيبُ عِنْد اللَّهِ مِنْ رِيحِ المِسْكِ . للصَّائمِ فَرْحَتَانِ يفْرحُهُما : إِذا أَفْطرَ فَرِحَ بفِطْرِهِ ، وإذَا لَقي ربَّهُ فرِح بِصوْمِهِ » . متفقٌ عليه وهذا لفظ روايةِ الْبُخَارِي . وفي رواية له : « يتْرُكُ طَعامَهُ ، وَشَرابَهُ ، وشَهْوتَهُ ، مِنْ أَجْلي ، الصِّيامُ لي وأَنا أَجْزِي بِهِ ، والحسنَةُ بِعَشْرِ أَمْثَالِهَا » . وفي رواية لمسلم : « كُلُّ عَملِ ابنِ آدَمَ يُضَاعفُ الحسَنَةُ بِعشْر أَمْثَالِهَا إِلى سَبْعِمِائة ضِعْفٍ . قال اللَّه تعالى : إِلاَّ الصَّوْمَ فَإِنَّهُ لِي وأَنا أَجْزي بِهِ : يدعُ شَهْوتَهُ وَطَعامَهُ مِنْ أَجْلي . لِلصَّائم فَرْحتَانِ :فرحة عند فطره ، فَرْحةٌ عِنْدَ لقَاء رَبِّهِ . ولَخُلُوفُ فيهِ أَطْيَبُ عِنْدَ اللَّهِ مِنْ ريحِ المِسْكِ » .
💠 រ៉ស៊ូលុលឡោះﷺមានប្រសាសន៍ថា ៖
« បុគ្គលណាបួសនៅក្នុងខែរ៉ម៉ាឌនដោយមានជំនឿ និងរំពឹងផលបុណ្យពីអល់ឡោះ គេនឹងអភ័យទោសឲ្យគាត់នូវបាបកម្មនានាដែលគាត់បានសាងរួច » ។
قال رسول الله ﷺ : « مَنْ صَامَ رَمَضَانَ إِيمَاناً واحْتِساباً ، غُفِرَ لَهُ ما تَقَدَّمَ مِنْ ذنْبِهِ » . متفقٌ عليه
💠 រ៉ស៊ូលុលឡោះﷺមានប្រសាសន៍ថា ៖
« បុគ្គលណាហើយត្រូវបានបញ្ចប់ជីវិត(ស្លាប់) ដោយការបួសពេញមួយថ្ងៃ គឺគាត់នឹងបានចូលឋានសួគ៌ » ។
قال رسول الله ﷺ : « من ختم له بصيام يوم؛ دخل الجنة » . صحيح الجامع (6224)
💠 រ៉ស៊ូលុលឡោះﷺមានប្រសាសន៍ថា ៖
« ពិតណស់ នៅក្នុងឋានសួគ៌មានទ្វារមួយដែលគេហៅថា រ៉យយ៉ាន។ នៅថ្ងៃបរលោកអ្នកចូលតាមទ្វារនោះ គឺសុទ្ធតែជាអ្នកបួស គ្មានអ្នកណាម្នាក់ក្រៅពីពួកគេអាចចូលបានឡើយ។ គេបានប្រកាសថា តើពួកអ្នកបួសនៅឯណា? ពួកគេក៏បានក្រោកឈរឡើង គ្មានអ្នកណាម្នាក់ក្រៅពីពួកគេអាចចូលបានឡើយ។ នៅពេលដែលពួកគេចូលរួចគេក៏បិទទ្វារ ហើយគ្មានអ្នកណាម្នាក់ក្រៅពីពួកគេអាចចូលតាមទ្វារនោះឡើយ » ។
قال رسول الله ﷺ : « إِنَّ فِي الجَنَّة باباً يُقَالُ لَهُ : الرَّيَّانُ ، يدْخُلُ مِنْهُ الصَّائمونَ يومَ القِيامةِ ، لا يدخلُ مِنْه أَحدٌ غَيرهُم ، يقالُ: أَينَ الصَّائمُونَ ؟ فَيقومونَ لا يدخلُ مِنهُ أَحَدٌ غيرهم ، فإِذا دَخَلوا أُغلِقَ فَلَم يدخلْ مِنْهُ أَحَدٌ » . متفقٌ عليه
💠 រ៉ស៊ូលុលឡោះﷺមានប្រសាសន៍ថា ៖
« ខ្ញុំគ្រប់រូបដែលបានបួសមួយថ្ងៃដើម្បីអល់ឡោះ ទ្រង់នឹងធ្វើឲ្យគាត់ឃ្លាតឆ្ងាយពីនរកចំនួន៧០ឆ្នាំ » ។
قال رسول الله ﷺ : « مَا مِنْ عبْدٍ يصُومُ يَوماً في سبِيلِ اللَّه إِلاَّ باعَدَ اللَّه بِذلك اليَومِ وجهَهُ عَن النَّارِ سبعينَ خرِيفاً » . متفقٌ عليه
💠 រ៉ស៊ូលុលឡោះﷺមានប្រសាសន៍ថា ៖
« បុគ្គលណាបួសមួយថ្ងៃដើម្បីអល់ឡោះ អល់ឡោះនឹងបង្កើតប្រឡាយមួយនៅចន្លោះរវាងគាត់ និងឋាននរក ដែលមានចម្ងាយដូចមេឃនិងដី » ។
قال رسول الله ﷺ : « مَنْ صامَ يَوْماً في سبيل اللَّهِ جَعَلَ اللَّه بينَهُ وَبيْنَ النَّارِ خَنْدَقاً كَمَا بيْن السَّماءِ والأرْضِ » . رواهُ الترمذي وقال:حديثٌ حسنٌ صحيحٌ .
ហេតុអ្វីបានជាគេឲ្យឈ្មោះខែរ៉ម៉ាឌនថារ៉ម៉ាឌន?
💠 អ៊ីម៉ាំ អាស្សាវកានី رحمه الله បានមានប្រសាសន៍ថា ៖
« គេបាននិយាយថា : ការពិតគេឲ្យឈ្មោះថា រ៉ម៉ាឌន(ដែលមានន័យថា ក្តៅខ្លាំង) ដោយសារនៅក្នុងខែនេះវាដុតបំផ្លាញបាបកម្ម ពោលគឺ វាដុតបំផ្លាញបាបកម្មដោយទង្វើល្អទាំងឡាយ » ។
قال الإمام الشوكاني رحمه الله : « وقيل: إنما سمي "رمضان" لأنه يرمض الذنوب؛ أي: يخرقها بالأعمال الصالحة » . فتح القدير 185/1
