វេទិកា សំណួរ-ចម្លើយ
តេស្តសំណួរអុិស្លាម
ឯកសារកូដអត្ថន័យនៃពាក្យសក្ខីកម្ម محمد رسول الله (មូហាំម៉ាត់ជាអ្នកនាំសាររបស់អល់ឡោះ)
គឺការជឿជាក់ចំពោះព័ត៌មាន ឬដំណឹងទាំងឡាយដែលរ៉ស៊ូលុលឡោះ ﷺ លោកបានប្រាប់ អនុវត្តតាមបទបញ្ជាទាំងឡាយដែលលោកបានបង្គាប់ប្រើ និងជៀសឆ្ងាយពីប្រការទាំងឡាយដែលលោកបានហាមឃាត់ ហើយគោរពសក្ការៈចំពោះអល់ឡោះទៅតាមអ្វីដែលលោកបានដាក់ច្បាប់បញ្ញត្តិមកចំពោះយើង និងបានបង្រៀនវាដល់ពួកយើង។ ហើយវាគ្របដណ្តប់លើប្រការដូចខាងក្រោម ៖
១) ជឿជាក់ចំពោះព័ត៌មាន ឬដំណឹងទាំងអស់ដែលលោកបានប្រាប់ ក្នុងនោះមានដូចជា៖
- ប្រការអាថ៌កំបាំង ថ្ងៃបរលោក ឋានសួគ៌និងបរមសុខរបស់វា ហើយនិងឋាននរកនិងទណ្ឌកម្មរបស់វា។
- ហេតុការណ៍ដែលនឹងកើតឡើង ដូចជាព្រឹត្តិការណ៍នៃថ្ងៃបរលោក សញ្ញាសម្គាល់ថ្ងៃបរលោក ហើយនិងអ្វីដែលនឹងកើតមានឡើងនៅក្នុងសម័យកាលចុងក្រោយ(មុនថ្ងៃបរលោកមកដល់)។
- រឿងរ៉ាវរបស់អ្នកជំនាន់មុន និងរឿងរ៉ាវពីអតីតកាល ហើយនិងអ្វីដែលកើតមានរវាងបណ្តាព្យាការី និងប្រជាជាតិរបស់ពួកគាត់។
២) អនុវត្តតាមបទបញ្ជាទាំងឡាយដែលលោកបានបង្គាប់ប្រើ និងជៀសឆ្ងាយពីប្រការទាំងឡាយដែលលោកបានហាមឃាត់ ហើយវារួមបញ្ចូល៖
- អនុវត្តតាមបទបញ្ជាទាំងឡាយដែលរ៉ស៊ូលុលឡោះ ﷺ លោកបានបង្គាប់ប្រើពួកយើងឲ្យអនុវត្តវា ដូចជាការគោរពសក្ការៈ ការសាងអំពើល្អ និងប្រកាន់ខ្ជាប់អត្តចរិតល្អប្រពៃ។
- ជៀសឆ្ងាយពីប្រការទាំងឡាយដែលលោកបានហាមឃាត់ពួកយើងមិនឲ្យប្រព្រឹត្តវា ដូចជាសុជីវធម៌មិនល្អ និងឥរិយាបថដែលបង្កគ្រោះថ្នាក់ ហើយយើងត្រូវជឿថា ពិតណាស់ ការដែលលោកហាមឃាត់យើងពីប្រការទាំងនេះ គឺមានបុព្វហេតុច្បាស់លាស់ដែលអល់ឡោះទ្រង់មានចេតនា ហើយវាផ្តល់ផលប្រយោជន៍ដល់យើង ទោះបីជាពេលខ្លះ យើងមិនដឹងពីបុព្វហេតុទាំងនោះក៏ដោយ។
- ត្រូវជឿប្រាកដក្នុងចិត្តថា ជាការពិតណាស់ ព្យាការី ﷺ លោកមិននិយាយអ្វីតាមទំនើងចិត្តរបស់លោកនោះទេ ផ្ទុយទៅវិញ វាជាវ៉ាហ៊ី(រាជសារ)ពីអល់ឡោះជាម្ចាស់ ដូចដែលទ្រង់បានមានបន្ទូលថា៖ “អ្នកណាហើយប្រតិបត្តិតាមអ្នកនាំសារ(មូហាំម៉ាត់) គឺគេពិតជាបានប្រតិបត្តិតាមអល់ឡោះ”។ (អាន់នីសាក៖៨០)
- យើងជឿថា ជាការពិតណាស់ ជនណាហើយដែលធ្វើផ្ទុយពីបទបញ្ជារបស់ព្យាការី ﷺ គឺគេសក្តិសមបំផុតនឹងទទួលទណ្ឌកម្មដ៏សែនឈឺចាប់ ដូចដែលទ្រង់បានមានបន្ទូលថា៖ “ដូចេ្នះ ចូរឱ្យពួកដែលប្រឆាំងនឹងបទបញ្ជារបស់គាត់ប្រុងប្រយ័ត្នចំពោះគ្រោះអាសន្ននឹងធ្លាក់លើពួកគេ ឬទណ្ឌកម្មយ៉ាងឈឺចាប់ធ្លាក់លើពួកគេ”។ (អាន់នួរ៖៦៣)
៣) ពួកយើងមិនគោរពសក្ការៈចំពោះអល់ឡោះឡើយ លើកលែងតែវាស្របទៅតាមអ្វីដែលព្យាការី ﷺ លោកបានដាក់បញ្ញត្តិច្បាប់សម្រាប់ពួកយើង។ នៅក្នុងចំណុចនេះ គឺផ្ទុកទៅដោយប្រការជាច្រើនដែលចាំបាច់ត្រូវសង្កត់ធ្ងន់ចំពោះវា៖
ធ្វើតាមគំរូរបស់លោក
រ៉ស៊ូលុលឡោះ ﷺ គឺជាគំរូរបស់យើង។ កាលណាគេប្រតិបត្តិតាមការចង្អុលបង្ហាញ និងមាគ៌ា(ស៊ុណ្ណះ)របស់លោក ពោលគឺរាល់ពាក្យសម្តី ទង្វើ ការឯកភាព និងការទទួលស្គាល់របស់លោកកាន់តែខ្ជាប់ខ្ជួន នោះរូបគេក៏កាន់តែខិតទៅជិតព្រះជាម្ចាស់របស់គេ និងមានឋានៈកាន់តែខ្ពង់ខ្ពស់ចំពោះទ្រង់។ អល់ឡោះជាម្ចាស់ទ្រង់បានមានបន្ទូលថា៖ “ចូរអ្នកពោលថា៖ ប្រសិនបើពួកអ្នកស្រឡាញ់អល់ឡោះ ចូរពួកអ្នកប្រតិបត្ដិតាមខ្ញុំ នោះអល់ឡោះពិតជាស្រឡាញ់ពួកអ្នក និងអភ័យទោសឱ្យពួកអ្នកនូវបាបកម្មទាំងឡាយរបស់ពួកអ្នក។ ហើយអល់ឡោះមហាអភ័យទោស មហាអាណិតស្រឡាញ់”។ (អាលីអ៊ិមរ៉ន៖៣១)
ច្បាប់បញ្ញត្តិពេញលេញ
រ៉ស៊ូលុលឡោះ ﷺ បានផ្សព្វផ្សាយសាសនាឥស្លាម និងច្បាប់បញ្ញត្តិទាំងឡាយរបស់ឥស្លាមយ៉ាងពេញលេញដោយគ្មានខ្វះចន្លោះត្រង់ណាមួយឡើយ។ ដូច្នេះ គេមិនអនុញ្ញាតឲ្យបុគ្គលណាម្នាក់បង្កើតការគោរពសក្ការៈ(អ៊ីហ្ពាហ្ទាត់)ណាមួយថ្មីនូវអ្វីដែលរ៉ស៊ូលុលឡោះ ﷺ លោកមិនបានដាក់បញ្ញត្តិច្បាប់សម្រាប់ពួកយើងនោះឡើយ។
ច្បាប់បញ្ញត្តិរបស់អល់ឡោះជាម្ចាស់ គឺសមស្របសម្រាប់គ្រប់សម័យកាល និងគ្រប់ទីកន្លែង
ក្បូនច្បាប់ឥស្លាម និងច្បាប់បញ្ញត្តិទាំងឡាយដែលមានចែងនៅក្នុងគម្ពីររបស់អល់ឡោះ(គម្ពីរគួរអាន) និងស៊ុណ្ណះ(មាគ៌ា)រ៉ស៊ូលុលឡោះ ﷺ គឺសមស្របសម្រាប់គ្រប់សម័យកាល និងគ្រប់ទីកន្លែងទាំងអស់ ព្រោះថាគ្មានបុគ្គលណាម្នាក់ដឹងពីអ្វីដែលផ្តល់គុណប្រយោជន៍ដល់មនុស្សជាងព្រះជាម្ចាស់ដែលជាអ្នកបានបង្កើតពួកគេ និងធ្វើឲ្យពួកគេមានវត្តមានពីភាពទទេនោះឡើយ។
ស្របទៅតាមស៊ុណ្ណះ
ដើម្បីឲ្យអល់ឡោះទទួលយកការគោរពសក្ការៈ(អ៊ីហ្ពាហ្ទាត់) គឹចាំបាច់ត្រូវមានភាពស្មោះស ជ្រះថ្លា(អៀខ្លើស)ក្នុងការនៀតចំពោះអល់ឡោះ ﷺ ហើយការគោរពសក្ការៈនោះ ត្រូវស្របតាមអ្វីដែលរ៉ស៊ូលុលឡោះ ﷺ លោកបានដាក់បញ្ញត្តិច្បាប់មកលើពួកយើង ដូចដែលអល់ឡោះជាម្ចាស់ទ្រង់បានមានបន្ទូលថា៖ “ដូច្នេះ បុគ្គលណាហើយដែលសង្ឃឹមថា នឹងបានជួបម្ចាស់របស់គេ ចូរឲ្យគេសាងអំពើល្អ ហើយកុំឲ្យគេយកអ្នកណាម្នាក់ធ្វើជាដៃគូក្នុងការគោរពសក្ការៈចំពោះម្ចាស់របស់គេឲ្យសោះ”។ (អាល់កះហ្វ៍៖១១០)។ អត្ថន័យពាក្យថា “អំពើល្អ” គឺសំដៅលើអំពើដែលល្អត្រឹមត្រូវស្របតាមស៊ុណ្ណះ(មាគ៌ា លំអាន)របស់រ៉ស៊ូលុលឡោះ ﷺ។
មិនត្រូវបង្កើតថ្មីនៅក្នុងសាសនា
បុគ្គលណាដែលបានច្នៃប្រឌិតបង្កើតនូវការគោរពសក្ការៈ(អ៊ីហ្ពាហ្ទាត់)ថ្មីដែលមិនមាននៅក្នុងស៊ុណ្ណះ(លំអាន)របស់ព្យាការី ﷺ ហើយគេចង់គោរពសក្ការៈទៅចំពោះអល់ឡោះតាមអ្វីដែលគេបានបង្កើតថ្មីនោះ ដូចជាបុគ្គលម្នាក់បង្កើតនូវការសឡាតថ្មីមួយខុសពីអ្វីដែលច្បាប់បញ្ញត្តិឥស្លាមបាននាំមក ពិតណាស់ គឺគេជាអ្នកដែលធ្វើផ្ទុយពីបទបញ្ជារបស់ព្យាការី ﷺ និងត្រូវទទួលបាបកម្មចំពោះទង្វើនោះ ហើយអំពើនោះនឹងត្រឡប់ទៅកាន់គេវិញ។ អល់ឡោះជាម្ចាស់ទ្រង់បានមានបន្ទូលថា៖ “ដូចេ្នះ ចូរឱ្យពួកដែលប្រឆាំងនឹងបទបញ្ជារបស់គាត់ប្រុងប្រយ័ត្នចំពោះគ្រោះអាសន្ននឹងធ្លាក់លើពួកគេ ឬទណ្ឌកម្មយ៉ាងឈឺចាប់ធ្លាក់លើពួកគេ”។ (អាន់នួរ៖៦៣)។ ព្យាការី ﷺ លោកបានមានប្រសាសន៍ថា៖ “បុគ្គលណាបង្កើតអ្វីមួយថ្មីនៅក្នុងកិច្ចការសាសនារបស់យើង ហើយប្រការនោះមិនមែនជាកិច្ចការសាសនាពីយើងទេ វានឹងត្រូវគេបដិសេធចោល”។ (ពូខរី៖២៦៩៧, មូស្លីម៖១៧១៨)
មានចិត្តស្រឡាញ់ចំពោះលោក
ក្នុងចំណោមកត្តាចាំបាច់ដែលត្រូវមានចំពោះជំនឿលើព្យាការី ﷺ គឺគេត្រូវមានក្តីស្រឡាញ់ទៅចំពោះអល់ឡោះ និងអ្នកនាំសាររបស់ទ្រង់ ជាងអ្វីៗទាំងអស់ ដូចដែលព្យាការី ﷺ លោកបានមានប្រសាសន៍ថា៖ “បុគ្គលម្នាក់ៗក្នុងចំណោមពួកអ្នកមិនទាន់មានជំនឿពេញលេញទេ លុះត្រាតែគេស្រឡាញ់មកចំពោះខ្ញុំជាងឪពុកម្តាយរបស់គេ កូនចៅរបស់គេ និងជាងមនុស្សលោកទាំងអស់។ (ពូខរី៖១៥, មូស្លីម៤៤)
